ဒုတိယသမ္မတ ဦးဟင်နရီဗန်ထီးယူ ၂၀၁၈ ခုနှစ် အပြည်ပြည်ဆိုင်ရာသမ၀ါယမနေ့ အခမ်းအနားသို့ တက်ရောက်အမှာစကားပြောကြား

Printer-friendly versionSend by email

 

နေပြည်တော်၊ ဇူလိုင် ၇

၂၀၁၈ခုနှစ်၊ အပြည်ပြည်ဆိုင်ရာသမဝါယမနေ့အခမ်းအနားကို ယနေ့ နံနက် ၉ နာရီ တွင်နေပြည်တော်ရှိ စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာန သမ၀ါယမဦးစီး ဌာန ရုံးအမှတ် (၁၆)၌ ကျင်းပရာ ဒုတိယသမ္မတ ဦးဟင်နရီဗန်ထီးယူ တက်ရောက်အမှာ စကားပြောကြားသည်။

အခမ်းအနားသို့ ပြည်ထောင်စုဝန်ကြီးများဖြစ်ကြသည့် ဒေါက်တာအောင်သူ၊ ဦးသိန်းဆွေ၊ နိုင်သက်လွင်နှင့် ဦးကျော်တင်၊ ဒုတိယ၀န်ကြီး ဦးလှကျော်၊ နေပြည်တော် ကောင်စီဝင်များ၊ လွှတ်တော်ကိုယ်စားလှယ်များ၊ အမြဲတမ်းအတွင်းဝန်များ၊ ညွှန်ကြားရေး မှူးချုပ်များ၊ ဗဟိုသမ၀ါယမအသင်း လီမိတက်၊ တိုင်းဒေသကြီးနှင့် ပြည်နယ်သမ၀ါယမ အသင်းစု ဥက္ကဋ္ဌများနှင့် ဒါရိုက်တာ အဖွဲ့ဝင်များ၊ INGO ၊ NGO များ၊ သမ၀ါယမအသင်းသူ အသင်းသားများနှင့် တာဝန်ရှိသူများတက်ရောက်ကြသည်။

ရှေးဦးစွာ ၂၀၁၈ခုနှစ်၊ အပြည်ပြည်ဆိုင်ရာသမဝါယမနေ့ဈေးရောင်းပွဲတော် ဖွင့်ပွဲအခမ်းအနားကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ သမ၀ါယမ ဦးစီးဌာနရုံးရှေ့မျက်နှာစာ၌ ကျင်းပရာ ပြည်ထောင်စုဝန်ကြီး ဒေါက်တာအောင်သူ၊ ဒုတိယ၀န်ကြီး ဦးလှကျော်၊ ဗဟိုသမ၀ါယမအသင်းဥက္ကဋ္ဌ ဦးခင်မောင်အေးနှင့် တာဝန်ရှိသူများက ဖဲကြိုးဖြတ်ဖွင့်လှစ်ကြသည်။

ထို့နောက် ဒုတိယသမ္မတ ဦးဟင်နရီဗန်ထီးယူသည် ၂၀၁၈ခုနှစ်၊ အပြည်ပြည် ဆိုင်ရာသမဝါယမနေ့အထိမ်းအမှတ်အရောင်းပြခန်းများကို လှည့်လည်ကြည့်ရှုသည်။

ယင်းနောက် ၂၀၁၈ခုနှစ်၊ အပြည်ပြည်ဆိုင်ရာသမဝါယမနေ့ အခမ်းအနားကို သမ၀ါယမဦးစီးဌာန အစည်းအဝေးခန်းမ၌ ဆက်လက်ကျင်းပရာ ဒုတိယသမ္မတ ဦးဟင်နရီဗန်ထီးယူ က ယနေ့ကျင်းပသည့် အခမ်းအနားသည် မြန်မာနိုင်ငံတွင် (၂၄) ကြိမ် မြောက် ကျင်းပပြုလုပ်သည့် အပြည်ပြည်ဆိုင်ရာသမဝါယမနေ့ အခမ်းအနား ဖြစ်ပါ ကြောင်း။

ယနေ့ကမ္ဘာတွင် လူသားများသည် ဆင်းရဲချမ်းသာကွာဟချက်များအပါအ၀င် လူမှုရေးနှင့် စီးပွားရေး မညီမျှမှုများကိုစိန်ခေါ်မှုအဖြစ် နေ့စဉ်ကြုံတွေ့နေကြရပါကြောင်း၊ ထို့ပြင် စစ်မက်ဖြစ်ပွားမှု၊ အစားအစာငတ်မွတ်ခေါင်းပါးမှု၊ သဘာဝပတ်ဝန်းကျင်ပျက်စီး ယိုယွင်းမှုနှင့် သဘာဝဘေးဆိုးများကျရောက်မှု၊ ရောဂါဆိုးဖြစ်ပွားမှု၊လူကုန်ကူးမှု၊ လူမျိုးရေး ပဋိပက္ခများဖြစ်ပွားမှု၊ အလုပ်လက်မဲ့ဖြစ်မှုနှင့် နယ်စပ်ဖြတ်ကျော်မှုခင်းများဖြစ်ပွားမှု စသဖြင့် များစွာသောပြဿနာများကိုရင်ဆိုင်နေကြရကြောင်း၊ ထိုသို့သောမညီမျှမှုများနှင့် ပဋိပက္ခ စိန်ခေါ်မှုများလျော့ပါး သက်သာစေရန် သမဝါယမအသင်းအဖွဲ့များကလည်းတစ်ဖက်တစ် လမ်းကဆောင်ရွက်သွားရမည်ဖြစ်ပါကြောင်း။

ကမ္ဘာ့ကုလသမဂ္ဂအဖွဲ့ကြီးကချမှတ်ထားသည့် ၂၀၃၀ ခုနှစ်အထိ စဉ်ဆက်မပြတ် ဖွံ့ဖြိုးရေး ပန်းတိုင်(၁၇)ရပ်ကို ကမ္ဘာ့နိုင်ငံအသီးသီးကအကောင်အထည်ဖော် ဆောင်ရွက် လျက်ရှိ နေကြပါကြောင်း၊ အပြည်ပြည်ဆိုင်ရာသမဝါယမအဖွဲ့ချုပ်(International Cooperative Alliance -ICA)အနေဖြင့်ကုလသမဂ္ဂ၏ စဉ်ဆက်မပြတ်ဖွံ့ဖြိုးရေးပန်းတိုင် (၁၂)တွင်ပါရှိသည့် စဉ်ဆက်မပြတ်စားသုံးခြင်းနှင့် ထုတ်လုပ်ခြင်းပုံစံများဖြစ်ပေါ်စေရေးကို သိသာပေါ်လွင်စွာ အကောင်အထည်ဖော်ဆောင်ရွက်ကြရန် ကမ္ဘာ့သမဝါယမအသင်း အဖွဲ့များသို့ တိုက်တွန်းနှိုးဆော်ထားသည်ကိုတွေ့ရမည်ဖြစ်ပါကြောင်း၊ အဆိုပါ ပန်းတိုင် (၁၂)ကို အကောင်အထည်ဖော်ရာတွင် "ဖွံ့ဖြိုးဆဲနိုင်ငံများ၏ဖွံ့ဖြိုးတိုးတက်မှုနှင့် လုပ်ဆောင်နိုင်စွမ်းကို ထည့်သွင်းစဉ်းစားပြီးနိုင်ငံအားလုံးပါဝင်သည့် စဉ်ဆက်မပြတ်စားသုံး ခြင်းနှင့် ထုတ်လုပ်ခြင်းပုံစံများပါဝင်သည့် မူဘောင်ချမှတ်ရေး၊ ၂၀၃၀ ခုနှစ်တွင် သဘာဝအရင်းအမြစ် များကိုအကျိုးရှိထိရောက်စွာအသုံးချနိုင်ရေး၊ စဉ်ဆက်မပြတ်ဖွံ့ဖြိုး တိုးတက်မှုနှင့် ဘဝနေထိုင်မှုအတွက်သတင်းအချက်အလက်ကို နေရာတိုင်း၌ လူတိုင်း ရရှိရေး" တို့ကို ဦးစားပေးဆောင်ရွက်သွားကြရမည်ဖြစ်ပါကြောင်း။

ဝန်ကြီးဌာန၏ မြန်မာ့သမဝါယမကဏ္ဍအနေဖြင့်လည်း လက်ရှိရရှိထားသည့် အောင်မြင်မှုအရှိန်အဟုန်အတိုင်းဆက်လက် ကြိုးပမ်းဆောင်ရွက်သွားကြရမည်ဖြစ်ပါ ကြောင်း၊ သမဝါယမဦးစီးဌာနနှင့်သမဝါယမအသင်းအဆင့်ဆင့်တို့၏ပူးပေါင်းဆောင်ရွက်မှု ဖြင့် သမဝါယမအသင်းသားတောင်သူဦးကြီးများသို့ အသေးစားအရင်းအနှီးချေးငွေများ ထုတ်ချေးနေသည်ကို တွေ့ရှိရပါကြောင်း။
ပြန်လည်ပေးဆပ်ပြီးသည့် စိုက်ပျိုးရေးသမဝါယမအသင်းသားများအတွက် (၁၀) ကြိမ်မြောက်အဖြစ် အသေးစားအရင်းအနှီးချေးငွေကျပ် (၅၄၂ ဒသမ၇၈၂) ဘီလီယံ၊ စက်မှုလယ်ယာစနစ်သို့အဆင့်မြှင့်တင်ရန် လယ်ဧက(၂၄၉၀၁ ဒသမ ၈၀)အတွက် ချေးငွေ ကျပ်(၇ ဒသမ၁၈၇)ဘီလီယံနှင့် မျိုးစေ့ထုတ်သမဝါယမအသင်းများသို့ချေးငွေကျပ် (၁ ဒသမ၁၅၈)ဘီလီယံတို့ကို ဗဟိုသမဝါယမအသင်းမှတစ်ဆင့် အသင်းစုချုပ်များသို့ ချေးငွေ များပေးအပ်သွားမည်ဖြစ်ပါကြောင်း၊ အဆိုပါချေးငွေများကိုမိမိတို့ တိုင်းဒေသကြီးနှင့် ပြည်နယ်အတွင်းရှိသမဝါယမအသင်းသားများသို့ အသင်းအဆင့်ဆင့်လမ်းကြောင်းမှ တဆင့်စနစ်တကျအမြန်ဆုံးဆက်လက်ထုတ်ချေးပေးသွားစေလိုပါကြောင်း။

လယ်ယာကဏ္ဍမူဝါဒနှင့်လုပ်ငန်းစဉ်များတွင် သမဝါယမကဏ္ဍကို ပါဝင်အကောင် အထည်ဖော်ဆောင်ရွက်နေခြင်းသည် တိုင်းပြည်၏စီးပွားရေးဖွံ့ဖြိုးတိုးတက်မှုကို အထောက်အကူပြုနေပါကြောင်း၊ ကမ္ဘာ့နိုင်ငံများတွင်သမဝါယမလုပ်ငန်းများအောင်မြင် ဖွံ့ဖြိုးတိုးတက်လျှက်ရှိပြီးလူမှုစီးပွားဘဝဖွံ့ဖြိုးရေးအထောက်အကူပြုလျှက်ရှိနေသည် ကို တွေ့မြင်ကြရမည်ဖြစ်ပါကြောင်း၊ မိမိတို့နိုင်ငံ၏ သမဝါယမကဏ္ဍဖွံ့ဖြိုးတိုးတက်ရေးအတွက် စိုက်ပျိုးရေး၊ မွေးမြူရေးနှင့် ကုန်ထုတ်လုပ်မှုအခန်းကဏ္ဍများတွင် သမဝါယမအသင်းများ အနေဖြင့် ယခုလက်ရှိအနေအထားထက် ပိုမိုလုပ်ဆောင်ပေးကြစေလိုပါကြောင်း၊ မျိုးစေ့ ထုတ်လုပ်ရေးသမဝါယမအသင်း၊ လယ်ယာအထောက်အကူပြုဝန်ဆောင်မှုသမဝါယမ အသင်းတို့အနေဖြင့် လယ်ယာသွင်းအားစုများရောင်းချခြင်းလုပ်ငန်းကို တောင်သူ ဦးကြီးများ၏ ဆန္ဒနှင့်အညီတိုးချဲ့ဖွဲ့စည်းသွားရန်နှင့်လယ်ယာထုတ်ကုန်သီးနှံတိုးမြှင့် ထုတ်လုပ်ရေးကွင်းဆက်တစ်လျှောက်ကူညီပံ့ပိုးဆောင်ရွက်သွားကြစေလိုပါကြောင်း၊ လူမှု စီးပွားဘဝများရေရှည်စဉ်ဆက်မပြတ်ဖွံ့ဖြိုးတိုးတက်လာစေရေးအတွက် မြန်မာ့သမဝါယမ များအနေဖြင့် ပူးပေါင်းပါဝင်ဆောင်ရွက်ပြီး လက်တွဲညီညီဆက်လက်လျှောက် လှမ်းကြရန် တိုက်တွန်းအပ်ပါကြောင်း ပြောကြားသည်။

ထို့နောက် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာအောင်သူ က ၂၀၁၈ခုနှစ်၊ အပြည်ပြည်ဆိုင်ရာသမဝါယမနေ့နှင့် စပ်လျဉ်း၍ ရှင်းလင်းတင်ပြသည်။
ယင်းနောက် ဗဟိုသမ၀ါယမအသင်း ဥက္ကဋ္ဌ ဦးခင်မောင်အေး က အပြည်ပြည် ဆိုင်ရာသမ၀ါယမအဖွဲ့ချုပ်မှပေးပို့သည့် သ၀ဏ်လွှာကို ဖတ်ကြားသည်။

ထို့နောက် ပြည်ထောင်စုဝန်ကြီး ဒေါက်တာအောင်သူ၊ ဒုတိယ၀န်ကြီး ဦးလှကျော်၊ နေပြည်တော်ကောင်စီဝင် ဦးအေးမောင်စိန်၊ ပြည်သူ့လွှတ်တော်၊ စိုက်ပျိုးရေး၊ မွေးမြူရေးနှင့် ကျေးလက်လူမှုဘ၀ဖွံ့ဖြိုးတိုးတက်ရေးကော်မတီ ဥက္ကဋ္ဌ ဦးရန်လင်း၊ တောင်သူလယ်သမား နှင့် အလုပ်သမားရေးရာကော်မတီ ဥက္ကဋ္ဌ ဦးကျော်မြင့်၊ အမျိုးသားလွှတ်တော်၊ စိုက်ပျိုးရေး၊ မွေးမြူရေးနှင့် လုပ်ငန်းကော်မတီ ဥက္ကဋ္ဌ ဦးအောင်ကြည်ညွှန့်၊ အမျိုးသားလွှတ်တော်၊ တောင်သူလယ်သမားရေးရာကော်မတီ ဥက္ကဋ္ဌ ဦးဘမျိုးသိန်း၊ ဗဟိုသမ၀ါယမအသင်းဥက္ကဋ္ဌ ဦးခင်မောင်အေး၊ အမြဲတမ်းအတွင်းဝန် ဒေါက်တာခင်ဇော်၊ အမြဲတမ်းအတွင်းဝန် ဦးကျော်ငွေနှင့် ညွှန်ကြားရေးမှူးချုပ် ဦးအောင်ဖြူ တို့က တိုင်းဒေသကြီး၊ ပြည်နယ်များသို့ အသေးစားအရင်းအနှီးချေးငွေများ၊ လယ်ယာမြေ အဆင့်မြှင့်တင်နိုင်ရေးအတွက် ပံ့ပိုးငွေများ၊ မြို့နယ်များ ဘက်စုံဖွံ့ဖြိုးတိုးတက်ရေးအတွက် ပံ့ပိုးချေးငွေများ၊ စက်ကိရိယာ ချေးငွေနှင့် မျိုးစေ့ထုတ် သမ၀ါယမအသင်းများအတွက် ပံ့ပိုးငွေများနှင့် သမ၀ါယမ အသင်းများ ဖွံ့ဖြိုးတိုးတက်ရေးအတွက် စွမ်းဆောင်ရည် အမြင့်မားဆုံး ဆုရ သမ၀ါယမ အသင်းစုချုပ်များနှင့် ကုန်ထုတ်/၀န်ဆောင်/ကုန်သွယ်မှုတွင် ဘက်စုံထူးချွန်ဆုရ အသင်း များကို ဆုများ ပေးအပ်ချီးမြှင့်ကြသည်။

ထို့နောက် ဒုတိယသမ္မတ ဦးဟင်နရီဗန်ထီးယူ သည် အခမ်းအနားသို့တက်ရောက် လာကြသူများနှင့်အတူမှတ်တမ်းတင်ဓာတ်ပုံရိုက်သည်။

အပြည်ပြည်ဆိုင်ရာသမဝါယမအဖွဲ့ချုပ်(International Cooperative Alliance-ICA)ကို နိုင်ငံတကာရှိသမဝါယမအသင်းများအချင်းချင်းချစ်ကြည်ရင်းနှီးစွာ ပေါင်းသင်း ဆက်ဆံရေးနှင့် စီးပွားရေးပူးပေါင်းဆောင်ရွက်မှုများတိုးတက်လာရေးတို့ကို ရည်ရွယ်၍ ၁၈၉၅ ခုနှစ်တွင်ဖွဲ့စည်းထူထောင်ခဲ့ခြင်းဖြစ်ကြောင်း၊ ၁၉၉၄ ခုနှစ်တွင် ကျင်းပသည့် (၄၉)ကြိမ်မြောက် ကမ္ဘာ့ကုလသမဂ္ဂအထွေထွေညီလာခံကြီးက နှစ်စဉ် ဇူလိုင်လ ပထမပတ် စနေနေ့ကို အပြည်ပြည်ဆိုင်ရာသမဝါယမ နေ့အဖြစ် ဂုဏ်ပြု သတ်မှတ် ပေးခဲ့ကြောင်း၊ ၂၀၁၈ခုနှစ် အပြည်ပြည်ဆိုင်ရာသမဝါယမနေ့ဆောင်ပုဒ်ဖြစ်သည့် ``စဉ်ဆက်ဖွံ့ဖြိုး ပြည့်အကျိုး၊ ထိုးဖောက်ဆောင်ရွက် ပူးပေါင်းလက် - Sustainable societies through cooperation"နှင့်အညီ သမဝါယမအသင်း အဖွဲ့များအနေဖြင့် အသင်းသား၊ အသင်းဝင် များအချင်းချင်း၊ အသင်းအချင်းချင်း အလျားလိုက်ဒေါင်လိုက် အချိတ်အဆက်မိမိ ပူးပေါင်းကြိုးပမ်းဆောင်ရွက်ခြင်းဖြင့် ရေရှည်စဉ်ဆက်မပြတ်ဖွံ့ဖြိုး တိုးတက်သော အသင်း အဖွဲ့များ ဖွဲ့စည်းထူထောင်သွားကြရန် အပြည်ပြည်ဆိုင်ရာသမဝါယမ အဖွဲ့ချုပ်ကြီးက တိုက်တွန်းနှိုးဆော်ထားကြောင်း သိရသည်။